間中素一素！~ 大自然素食

雜食吃得多，腸胃勞累，間中也要吃清一點；平衡平衡！


太子店已到訪多次，尖沙咀店是第一次光顧，地方比太子要大和濶落；還有兩間VIP 房。


坐定定，嘆番杯醇香的玄米茶的確好，日本出品，係唔同嘅。

人未齊，打算先點小吃，侍應問「要唔要飲番支啤酒？」，心諗：而家啲素食店乜可以賣酒嘅咩？原來佢得個樣；酒精度係零，不過味道就好鬼真嘞，差啲比佢呃咗㖭！

小吃有個很有型格的名堂 - 「反轉皮褸」，原來是裡衣外穿；將豆卜反轉再燒，因此外層更為脆口，隨意蘸點千島醬 或泰式辣醬；更加惹味甘香。

例湯(西洋菜)～

乾燥天喝碗清甜潤肺的湯水最合時宜，西洋菜此時更是當造期；天氣愈凍、菜愈甜，特愛那濃濃的菜香！別以為素湯就「淡茂茂」，只要懂配搭；一樣滋味，紅腰豆、花生等豆類除可令質感厚重外；更有豐富蛋白質，加埋粟米；點會唔好飲？



鮮竹銀杏湯浸翡翠苗～

吃素旨在清理腸胃，點這味當然錯不了。甜嫩的菜苗配鮮竹、銀杏，健康又有益。

戒吃牛多年，在素菜館就可以毫無顧慮、唔驚中招。這味「燒汁蘆筍牛柳卷」是大豆製品，厚切的肉身緊緊裹著蘆筍及金菇，索滿惹味的燒汁，很是不錯。

芫茜麻香黃金糖心皮蛋～

金黃清透的皮蛋質感像極了軟身啫喱，滑嘟嘟，非常黏口；流心效果跟賣相一流，且沒有一般皮蛋的刺鼻阿摩尼亞味；和着四川風味椒油，刺激又過癮。



香煎芋頭糕(配辣醬)～
濃濃的芋香，外層微脆，煙韌有咬口，配辣醬是最佳選擇。

辣醬～真是辣得香、辣得有層次（材料有素雞肉絲、猴頭菇絲、素瑤柱），深得大家的喜愛！

越南腰果露～
陣陣腰果香充斥口腔，比平常吃的更香口，原來是越南的優質貨，另一要訣原來是炒至將近燶時才磨成露，所以更加香濃，好此味者不要錯過！

間中一餐素食，感覺健康又有益，何況水準這麼好，看來要找多些時間再來幫襯了。