海中黑鑽石！

 有「海中黑鑽石」稱號魚子醬，據說昔日只有歐洲貴族才能享用的頂級美食，雖然現在也同樣昂貴，但已是你我都能享用。

Osteria 意籍主廚Paolo Federici ，以頂級嘅魚子醬，加上超高嘅烹調技巧，煮出精緻又奢華嘅意大利菜，兩者相得益彰層次豐富，魚籽在舌尖上爆湧的鮮味與回甘，更是令人一試難忘。

來這裡食，首先要講嘅當然係呢個自助頭盤，食物種類繁多，有多款不同嘅ham、芝士、冷盤、沙律菜、煙三文魚、海蝦、蟹腳，重有我至愛的火箭菜，怎能不快快拿一大碟回去好好享用。

酒店級數自然有一定水準，每樣試少少都已食到半飽，還是留肚等食主菜吧。

餐湯有三款，甘筍忌廉湯.炒雞油菌.黑松露、傳統海鮮辣蕃茄湯及基諾維斯雜菜素湯。

三款湯形成紅燈綠三色，我哋人多一於叫齊三款試吓，最後我要了其中的甘筍湯，口感滑溜、南瓜味香甜、加上黑松露薄片，惹味又好飲。

焗比目魚柳伴燒大磨菇及南瓜茸～

比目魚肉油潤，嫩滑多汁，更帶有一份油香味；配上濃香嘅魚子醬，更覺滋味；而大磨菇肉厚多汁，好吃。

慢煮龍蝦沙律配魚子醬伴橙味雪芭~

橙味雪芭清新又開胃，龍蝦肉爽口彈牙，蘆筍更新鮮甜美，吃後令人食欲大增。

番紅花意大利飯配紅蝦仁及魚子醬～

橙黃色的意大利飯，令人眼前一亮，表面放上紅蝦、魚子醬、青豆和食用花以作點綴；紅蝦鮮甜爽彈、魚子醬惹味、意大利飯軟硬度適中，真係好睇又好食的一味菜式。

魚子醬紅洋蔥煙三文魚薄餅～

薄餅有一定厚度，香脆中帶煙靱、表面加上煙熏味極濃的煙三文魚，而紅洋蔥爽脆的口感及惹味的魚子醬互相輝映，也提升了薄餅的質感和滋味。

吃完主菜，又到我至愛的甜品時間，選了呢度至出名嘅意大利芝上蛋糕及特濃咖啡伴香草雪糕及朱古力球。

意大利芝士蛋糕～

口感細滑柔軟，更帶有淡淡蛋香，可可粉嘅微苦與芝士狀嘅忌廉相融合，層次豐富又香甜；如可加多點咖啡酒，應該會更合我口味。

特濃咖啡伴香草雪糕及朱古力球～

上次吃過真係一試難忘，把剛煮好的濃縮咖啡(Espresso)，直接倒上朱古力球上，令朱古力漸漸溶化，內裡的冰淇淋與朱古力及濃縮咖啡混合在一起，苦甜味平衡，有冰火交融嘅滋味；底層嘅朱古力蛋糕，吸收咗所有精華後，每一啖都咁美味，想起又想再食了。

最後加多一杯latte，便完成今晚嘅飯局。

水準非常不錯，而且價錢也在合理水平，是一間值得推介的餐廳。

最後要祝大姐榮休之喜，退休快樂！身體健康！

Osteria 意大利餐廳

地址: 尖沙咀彌敦道50號金域假日酒店閣樓

電話: 23151010