無得過大海，友人反而特登走到港澳碼頭飲茶，見評語都唔錯，一於就趁假期同老婆嚟嘆早茶啦。
以前人來人往嘅港澳碼頭，因疫情關係變得十室九空，真令人始料不及。亦因為咁，本應人來人往嘅星期六都清清靜靜，如果唔想同人逼；舒舒服服飲餐茶，呢度係一個幾唔錯嘅選擇。🤔
店內有四間VIP房，鍾意私人空嘅就啱晒啦。
入店無耐就見到呢四個大玻璃壼，原來係自家手工製嘅養生酒，以二鍋頭釀造，包括「天山瑪咖養身酒」、「有機檸檬養顏酒」、「梅子酒」及「野生松茸酒」，一小壺價錢由$68至$108不等。
其實一小壺大概可分到四小杯，價錢唔貴，又一於試試；正猶豫選邊款好，親切嘅侍應姐姐話可每款比一小杯我哋試，總共只收一小壺錢，咁就至好不過啦。
天山瑪咖酒及野生松茸酒浸味都幾霸氣，檸檬同梅子酒就易受落得多啦，尤其是檸檬，幾清新吓。
點心選擇都唔少，揸唔定主意就一於跟食店推介👍🏻啦。
筍尖鮮蝦餃～
外型飽滿挺立，摺數均勻，半透明嘅餃皮平滑有光澤、蝦肉鮮甜爽彈，筍尖清鮮爽嫩，好吃！
羊肚菌鮮竹卷～
羊肚菌係一種低脂食材，食得多都唔會膩，薄而金黃嘅腐皮吸收咗上湯嘅精華，鮮香味甜、煙韌入味，餡料爽口彈牙，不錯吃。
煎蝦米腸粉～
坊間好多地方都有煎腸粉，但做得好就真係唔多，唔係煎咗等於無煎，就係煎得過火，最差就係番煎，死實實、硬骨骨，呢個好明顯係即叫即煎，軟硬度剛好，非常讚；加上適量嘅豉油、麻醬、甜醬或豆瓣醬，真係滋味無窮！
炸蝦多士～
蝦多士有多種做法，呢度係將蝦肉打成蝦膠，之後放喺三角麵包上，加上大量白芝麻，炸至金黃酥脆，伴最佳拍擋沙律醬，無得頂！
粟米魚肚粥～
魚肚熬煮至入味軟淋，粥底香滑綿密，粟米爽甜，清清哋，幾好。
脆皮五香素鵝～
腐皮包裹住冬菇絲、木耳絲及紅蘿蔔絲，加入適量五香粉、麻油、醬油等調味，慢火煎至金黃香脆，點啲喼汁，素食都可以香酥滋味㗎。
椒麻蕨根粉～
蕨根粉嘅外貌幾似墨魚意粉，滑嫩爽口，但佢其實係一種野生植物，含微量元素同氨基酸，係一種綠色保健食品，有清熱解毒功效，更可作減肥之用，加入惹味生津嘅調味，好啱夏天享用。
望落幾新淨，原來已開業多年，原本生意亦一直唔錯，咁用心經營嘅店舗係值得支持嘅。
望月軒
地址: 上環干諾道中168-200號信德中心西座3樓澳門廣場3017號舖
電話: 21114558
沒有留言:
張貼留言